Ullormusiat

Sulisillutit ajoqusersimaguit aammalu sulileqqissinnaanngikkallarlutit ullormusianik pisinnaatitaaffeqarputit. 

Ullormusiat tiimimut piffissami qaqugukkulluunniit suliffissarsiortunut ikiorsiissutit annertussusaat assigalugu annertussuseqarput aammalu kingumoortumik ullut 14-ikkaarlugit tunniunneqartarlutik. 

Aningaasat tigusassavit annertussusaa kisinneqartarpoq sapaatit akunneri 13-it kingullerni, sapaatip akunneranut tiimit suliffigisartakkavit agguaqatigiisinnerasigut. Sapaatip akunneranut tiimit 40 tiiminiik annerusinnaanngillat aammalu 20 tiiminiik minnerusinnaanatik. 

Ullormusianik pisinnaatitaaffeqarneq 

Ullormusianik pisinnaatitaaffeqarneq piumasaqaatitaqarpoq nakorsap allagarsiussaanik sulisilluni ajoquserneq peqqutigalugu sulisinnaannginnermik. 

Sulisilluni ajoquserneq peqqutigalugu ataavartumik kingunerluuteqarnermut taarsiiffigitinneq 

Sulisilluni ajoquserneq imaluunniit inuussutissarsiornermi nappaateqalerneq peqqutigalugu ataavartumik peqqissutsikkut kingunerluuteqalersimaguit, ataavartumik ajuuteqalernermut ajunngitsorsiassanik pisinnaatitaaffeqassaatit. Ajunngitsorsiassat ataavartumik ajuuteqalernermi nalunaarsuiffik aammalu nakorsap immikkut ilisimasallip allagarsiussaa aallaavigalugu naatsorsorneqartarput. 

Inuussutissarsiorsinnaanermut piginnaasatit, sulisilluni ajoquserneq imaluunniit inuussutissarsiornermik nappaat peqqutigalugu, apparsimappata, inuussutissarsiorsinnaanermut piginnaasanik annaasaqarnermut taarsiiffigitinnissamik pisinnaatitaaffeqarputit. Taarsiissut ukiumoortumik akissarsiatit aammalu sulisillutit ajoqusersimanngikkaluaruit qanoq isertitaqarsimasinnaagaluarnerni nalilersuinerit aallaavigalugit naatsorsorneqartarpoq. Ataatsimoortunik sillimmasiineq aqqutigalugu sillimmasernikuuguit ukiumoortumik akissarsianut immikkuullarissunik inatsiseqarpoq.