Maalaaruteqarsinnaaneq
Suliami ilinnut tunngasumi Sulisilluni AJoqusernerit pillugit Sullissiviup aalajangigai suulluunniit maalaarutigisinnaavatit. Maalaarutit Ankestyrelse-mit suliarineqartarput Sulisillunili Ajoqusernerit pillugit Sullissivimmut nassiunneqartussaallutik.
Kikkut maalaaruteqarsinnaappat?
Aalajangiinermi pineqartut ataani taakkartukkat maalaaruteqarsinnaatitaapput:
- Ajoqusertoq
- Piginnaatitaasoq. Ajoqusertup piginnaatitsissummik tunisimasaa, soorlu kattuffik imal. eqqartuussissuserisoq ajoqusertoq sinnerlugu naammagittaalliorsinnaatitaasoq
- Qimagaasut
- Sulisitsisup sillimmasiisarfia - ajutoortoqarnerani - imal. Arbejdsmarkedets Erhvervssygdomssikring – inuussutissarsiornikkut nappaateqalernermi
- Sulisitsisoq. Sulisitsisup sillimmasersimasup akuersineq/itigartitsineq kisiisa naammagittaalliutigisinnaavai. Sulisitsisup sillimmasersimanngitsup taarsiisussaatitaanissaa pissutigalugu aalajangikkat tamaasa naammagittaalliutigisinnaavai
Ima iliornikkut maalaaruteqarsinnaavutit
CFA-p aalajangiussaa maalaarutiginiarukku, nittartakkamiittoq immersugassiaq maalaaruteqarnissamut atugassiaq immersussagit innersuussutigaarput, taamaasilluta paasissutissat atorfissaqartitagut pissagatsigit.
Maalaaruteqarsinnaanermut piffissaliussaq
Maalaaruteqarniaruit aalajangiussap tiguneraniit sap. ak. 6 qaangiutsinnagit tutsiutissaatit.
Maalaaruteqarsinnaanermut piffissaliussaq qaangerneqarsimasorigutsigu, kingusinaarluni maalaarummik tigusaqarsimasorinninnitsinnik nalunaarluta suliaq Ankestyrelse-mut ingerlateqqissavarput. Ankestyrelsen-ip malaaruteqarsinnaanermut piffissaliussamik qaangiisoqarsimanera qaangiisoqarsimannginneraluunniit naliliivigissavaa.
Maalaarut sumut nassiunneqassava?
Maalaarutit Sulisilluni Ajoqusernerit pillugit Sullissivimmut nassiutissavat. Nittartakkakkut maalaaruteqarnissamut atugassiaq immersugassaq atorukku maalaarut toqqaannaq maanga nassiunneqassaaq.
Allanut nassiukkukku ingerlatinneqaqqinnissaa qulakkeersinnaanngilat taamaasillutillu malaaruteqarsinnaanermut piffissaliussaq qaangertoorsinnaavat.
Maalaarut Ankestyrelsemut toqqaannartumik nassiukkukku, suliamik ingerlatsinitsinnut kinguarsaataasumik uatsinnut ingerlateqqissavaat.
Ankestyrelsip aalajangiineq ilinnut iluaqutaanngitsumik allanngortissinnaavaa.
Ankestyrelse illit allalluunniit maalaarutaannut pituttorsimanngilaq. Tamanna ilinnut marlunnik sunniuteqarsinnaavoq:
- Tamakkiisumik aalajangiinermi Ankestyrelse-p maalaarutiginngisatit suliamili immikkut aalajangiivigisat suliarissallugit toqqarsinnaavai
- Ankestyrelse-p aalajangiineq ilinnut iluaqutaanngitsumik allanngortissinnaavaa – taarsiissutissat apparsinnaavai akuersinerlu akerlianik itigartitsininngorlugu aalajangiivigisinnaallugu
Immikkut ittumik pisoqartillugu Ankestyrelsip maalaarutiginngisat suliamili immikkut aalajangiivigisat suliarisarpai. Ankestyrelsip isumaa naapertorlugu suliaq kukkusumik naliliivigisimagipput ersarippat, taama pisoqarsinnaavoq.
Ankestyrelsip suliami immikkut aalajangiivigisat maalaarutiginngisatilli suliassanngortissallugit toqqarpatigik, nalinginnaasumik illuatungiliuttutut tusarniaavigissavaatsit nalunaarfigalutillu.
Tamatuma kingorna Ankestyrelse aalajangiitinnagu kissaatigigukku maalaarutit tunuartissinnaavat.
Sillimmasiisarfilli aamma maalaaruteqarsimappat maalaarutivit tunuartinneratigut suliaq unitsissinnaanngilat.