Maalaaruteqarneq
Sulisilluni Ajoqusernerit pillugit Sullissiviup suliami ilinnut tunngasumi aalajangigai tamaasa maalaarutigisinnaavatit (suliareqqitassanngortitsillutit). Maalaarutit Maalaaruteqartarfiup suliarisarpai, kisiannili maalaarutit Sulisilluni Ajoqusernerit pillugit Sullissivimmut nassiunneqassallutik.
Kikkut maalaaruteqarsinnaappat?
Aalajangiinermi sunnerneqartut tamarmik aalajangiinermut maalaaruteqarnissamut pisinnaatitaaffeqarput. Uani pineqarput:
- Ajoqusertoq
- Piginnaanititsissummik pilik. Ajoqusertoq kattuffimmut imaluunniit eqqartuussissuserisumut pisinnaatitsissummik tunniussisimappat, taanna ajoqusertoq sinnerlugu maalaaruteqarsinnaassaaq
- Ajoqusertumiik qimagaasut
- Sulisitsisup sillimmasiisarfia - sulisilluni ajutoornerni - imaluunniit Arbejdsmarkedets Erhvervssikring-i - inuussutissarsiornermi nappaatigilikkani
- Sulisitsisoq. Sulisitsisoq sillimmasernikoq taamaallaat suliap sulisilluni ajoqusernertut akuersissutigineqarnera/akuersissutigineqannginnera maalaarutigisinnaavaa. Sulisitsisoq sillimmasersimanngitsoq suliami aalajangiinerni tamani maalaaruteqarsinnaatitaassaaq, taarsiinissamut pisussaaffeqassagami
Ima iliornikkut maalaaruteqarsinnaavutit
Sulisilluni Ajoqusernerit pillugit Sullissivimmiik aalajangiineq maalaarutiginiarukku innersuussutigissavarput nittartakkatsinniittoq maalaaruteqarnissamut immersugassaq aqqutigalugu immersuinissat, taamaaliornikkut qulakkiissagatsigu paasissutissat pisariaqartitagut tamaasa tigunissaat.
Maalaaruteqarnissamut piffissaliussaq
Maalaaruteqarniaruit aalajangiineq tiguneraniik kingusinnerpaamik sapaatit akunneri arfinillit qaangiutsinnagit maalaaruteqarnermut ilisimatinneqassaagut. Suliami peqataasunut allanut maalaaruteqarnissaq aalajangiinerup tiguneraniik sapaatit akunnerinik sisamanik sivisussuseqarpoq.
Isumaqarutta maalaaruteqarnissamut piffissaq killiliussaq eqquutsinneqanngitsoq Maalaaruteqartarfimmut suliaq ingerlateqqissavarput, nalunaaruteqarluta maalaaruteqarnissamut piffissaliussaq eqquutsinneqanngitsoq. Taamaalinikkut eMaalaaruteqartarfiup nalilersussavaa maalaaruteqarsinnaanermut piffissaliussaq eqquutsinneqarnersoq imaluunniit eqquutsinneqannginnersoq.
Maalaarut sumut nassiunneqassava?
Maalaarut Sulisilluni Ajoqusernerit pillugit Sullissivimmut nassiunneqassaaq. Nittartakkakkut maalaaruteqarsinnaaneq atorneqarpat maalaarut toqqaannaq maanga nassiunneqassaaq.
Maalaarut allanut nassiunneqarpat naatsorsuutigineqarsinnaanngilaq uagutsinnut nassiunneqaqqinnissaa aammalu maalaaruteqarsinnaanermut piffissaliussaq qaangerneqarsinnaalluni.
Maalaarut Maalaaruteqartarfimmut toqqaannaq nassiunneqarpat Maalaaruteqartarfiup maalaarut uatsinnut nassiutissavaa, taamaalinikkut maalaarummik suliaqarneq sivitsorsarneqarsinnaalluni.
Maalaaruteqartarfiup aalajangiineq ilinnut iluatsitsiviunngitsumik allanngortissinnaavaa
Maalaaruteqartarfik ajoqusertup imaluunniit piginnaatitsissutillip maalaarutaanut pituttorsimanngilaq. Tamannalu marlunnik isumaqarsinnaavoq:
- Aalajangiinerni tamakkiisuni Maalaaruteqartarfik suliami aalajangiinerit allat, maalaarutigineqartup saniatigut, ilanngullugit suliarisinnaavai
- Maalaaruteqartarfiup aalajangiineq ajoqusertumut iluatsitsiviunngitsumik allanngortillugu aalajangiisinnaapput taarsiiffigitinnissaq appartissinnaavaat imaluunniit suliamik sulisilluni ajoqusernertut akuersissutiginninneq akuersissutaajunnaartissinnaallugu
Pisuni immikkut ittuni Maalaaruteqartarfiup suliami aalajangiinerit ilaat naammangittaalliuutaanngikkaluartut suliarisinnaasarpai. Tamannalu pisarpoq Maalaaruteqartarfiup nalilersorsimappagu suliamik nalilersuinerput kukkunerusoq.
Maalaaruteqartarfiup aalajangissappagu suliami aalajangiinerit ilaat naammangittaalliutaanngikkaluartut suliareqqinniarlugit, ajoqusertoq tusarniaavigissavaat aammalu ajoqusertumut (aammalu/imaluunniit piginnaatitsissutilimmut) ilisimatitsissalluni.
Ajoqusertoq imaluunniit piginnaatitsissutilik taamaalinikkut periarffissinneqassaaq Maalaaruteqartarfiup aalajangiinnginnerani naammangittaalliuummik utertitsinissamut.
Sillimmasiisarfilli suliami aalajangiinerni maalaaruteqaqataasimappat maalaarummik utertitsinissaq periarffissaanngilaq.