Sulisitsisuuit
Sulisitsisutut sulisuit ajoqusersinnaanerisa sillimmasernissaanut, sulisilluni ajutoornerit nalunaarutiginissaannut aamma suliaq pillugu paasissutissiinissannut pisussaaffeqarputit.
Sulisuit ajoqusersinnaanermut sillimmasernissaat isumannaarniarlugu, sillimmasiisarsarfimmut ilanngutissavat. Sulinermik patsiseqartumik nappaatinut sillimmasiinissamik pisussaaffiit eqquutsinniarukku AES-bidrag-imut akiliissaatit.
- Sulisutit qanoq sillimmasiisarfimmut ilanngutissavigit?
- AES-bidrag-imut ima akiliissaatit
- Sulisilluni ajoqusernerit nalunaarutiginissaanut pisussaaffiit
Sulisilluni ajutoornermi suliaq sulisitsisumit ima ingerlanneqarajuttarpoq
Sulisoq ajoquserpoq
Sulisilluni ajoquserneq marlunnut avinneqarsinnaavoq - sulisilluni ajutoornerit inuussutissarsiornermilu nappaatigilikkat.
Ajutoornerit tassaapput tassanngaannaq pisut imaluunniit ullut tallimat ingerlaneranni sunninneqarnermit pisut. Assersuutigineqarsinnaavoq sulisup nakkarnermigut nissuni napippagu imaluunniit ullut pingasut iluanni oqimaatsunik kivitaarinermini kinguneranik qimerlummi akornanni nataqqumik anillakartoorpat (diskusprolaps).
Sulinermik patsiseqartumik nappaateqalersarneq tassaavoq, sulisilluni ajoqutaasinnaasunik sivisuumik sunnerneqarneq. Soorlu tusillanneq imaluunniit nungullarnermik patsiseqartumik ajoqusernerit.
Ajoquserneq nalunaarutigineqassaaq
Sulisilluni ajoqusernerit nalunaarutigiuartassavatit. Ajoqusernerit Sulisilluni Ajoqusernerit pillugit Sullissivimmut pisoqarneraniit ullut qulingiluat qaangiutsinnagit nalunaarutigissavatit.
Sulisilluni ajoqusernerit nittartakkakkut nalunaarutigineqarsinnaapput, nalunaarullu Sullivinnik Nakkutilliisoqarfimmut aammalu Sulisilluni Ajoqusernerit pillugit Sullissivimmut ingerlaqqissapput. Ajutoornerit www.anmeld.gl aqqutigalugu nalunaarutigineqassapput.
Aammattaaq nalunaarfissat aniseriarlugit immersugassat nassiunneqarsinnaapput. Immersugassat Sullivinnik Nakutilliisoqarfimmit aammalu Sulisilluni Ajoqusernerit pillugit Sullissivimmiit pissarsiariniarneqarsinnaapput. Nittartakkakkut www.anmeld.gl aamma www.at.gl aqqutigalugit naqitanngorlugit anillatsinneqarsinnaapput.
Sulisitsisutut eqqumaffigissavat toqumik kinguneqartitsineq annertuumillu aqqunarnerit nal. ak. 48-t qaangiutsinnagit oqarasuaatikkut +299 58 64 74-imut sianernikkut Sulisilluni Ajoqusernerit pillugit Sullissivimmut nalunaarutigineqassammata.
Sulinermik patsiseqartumik nappaatigilikkap nalunaarutiginissaa sulisitsisutut pisussaaffiginngilat.
Akerlianilli sulisilluni ajutoornerup nalunaarutiginissaa pisussaaffigaat, taamaasiunnginnerlu akiliisitaanermik kinguneqassaaq.
Sulisilluni Ajoqusernerit pillugit Sullissiviup suliaq ingerlatissavaa
Sulisitsisutut suliap ingerlannerani paasissutissat ilaasa uppernarsinissaannut akuliutsinneqartarsinnaavutit. Assersuutigalugu nalunaarummi allassimasut sulisup ulluinnarni suliarisartagai uppernarsarnissaannut.
Suliap suliarinerani apeqqutit nassiussatta akinissaat sulisitsisutut pisussaaffigaat.
Sulisitsisutut sulisumut tunngatillugu suliamut nalinginnaasumik attuumassuteqanngilatit, taamaammallu suliamut tunngatillugu paasissutissanik takunnissinnaanissamut pisussaaffeqarnak.
Sulisilluni Ajoqusernerit pillugit Sullissivik suliap akuersaarneqarnerani aalajangiisuusarpoq
Aalajangiineq ajoqusersimasumut nassiunneqarnerpat aamma illit sulisitsisutut aalajangiineq tigussavat, tassanilu takuneqarsinnaassaaq ajoquserneq sulisilluni ajoqusernertut akuerisimaneripput – tassa ajoquserneq sulinermik imaluunniit suliffimmi atugarisanit patsiseqarnersoq.
Sulisitsisutut aalajangiinerup maalaarutiginissaanut periarfissaqarputit.
Aalajangiinerup taarsiivigineqarnissamut tunngasortaa ilinnut sulisitsisuusumut nassiunneqassanngilaq, taarsiivigitigineqarnissamullu aalajangiineq maalaarutigisinnaanngilat.
Sulisilluni ajoqusernermi inatsit naapertorlugu, sulisitsisutut qanoq pisoqarsinnaaneranut sillimaniarnermi akisussaaffik (taarsiiffigineqarnissamullu akisussaaffik) sillimmasiisarfinnut tunniunnikuuat. Taamaammat sillimmasiisarfik suliamut attuumassuteqartutut taarsiivigineqarnissamut aalajangiinermut maalaaruteqarsinnaatitaavoq.