Cfa.gl-imiit cookies-inik akuersineq

Cfa.gl –p cookies-it siunertarisanut arlalinnut atorpai – soorlu assersuutigalugu atuisut nittartakkatsinni nalaattagaasa pigsanngorsarnissaannut.

 

Aalisartut, piniartut savaatillillu akisussaaffitsik tiguaat

Aalisartut, piniartut savaatillillu akisussaaffitsik tiguaat

Aalisartut, piniartut savaatillillu imminnut sulisuminnullu sulisillutik ajoqusernernut isumannaarnissartik soqutigisorujusssuuaat. Kujataani paasisitsiniaalluni angalanermi naammasseqqammersumi, Sulisilluni Ajoqusernerit pillugit Sullissivimmi sulisut Nunatsinni sulisilluni ajoqusernernut sillimmasersinnaaneq, Ataatsimoortunut Sillimmaserneq, paasissutissiissutigaat.

Themo Benjaminsen Aappilattumeersoq aalisartuuvoq piniartuullunilu. Ilaatigut nannunik arlalinnik pisaqarsimavoq, qularutiginngilaalu inuussutissarsiuutimini sulisilluni ajoqusernernut isumannaarnissaq pisariaqartorujussuusoq.

"Sulisilluni ajoqusernernut isumannaarsimanissaq pingaartuuvoq. Siumut isigalunga uannut suleqatinnullu isumannaarsimanissara akikinneruvoq. Sillimmasersimanngikkuma kinguneri kisima akisussaaffigissavakka," Temo Benjaminsen oqaluttuarpoq.

Savaatillip Andala Lundip sulisilluni ajoqusernernut sillimmasersimanissap allanit ilisimaneqarnerulernissaa pingaartuutippaa.

"Sulisilluni ajoqusernernut sillimmasernissap eqqumaffigineqarnerulernissaanik iliuuseqartoqarnera qujanarpoq. Paasissutissat inunnut apuunneqarnissaat pingaaruteqarpoq," Andala Lund oqaluttuarpoq.

Sulisilluni Ajoqusernerit pillugit Sullissiviup ningiuata Kristina Nordby-Rachlitzip nuannaarutigaa imminut sulisoqaraannilu sulisut isumannaarnissaat annertunerusumik soqutigineqalermat.

"Aalisartut, piniartut savaatillillu sulisilluni ajoqusernernut sillimmasernissaminnut soqutiginninnerat assut tusarluarnarpoq. Inuussutissarsiutaat Kalaallit Nunaanni uloriarnarnerpaat ilagaat, taamaattumillu imminnut isumannaarnissaat uagut annertuumik anguniagaraarput." Kristina Nordby-Rachlitz oqaluttuarpoq.

Ataatsimoortunut sillimmaserneq aalisartut, piniartut savaatillillu kajumissutsiminnik ilaasortaaffigisinnaavaat, taamaattorli sulisitsisoq inatsit naapertorlugu sulisumi sulisillutik ajoqusersinnaanerisa sillimmasernissaat pisussaaffigaa. Ataatsimoortunut Sillimmaserneq Kalaallit Nunaanniinnaq atuuttussanngorlugu pilersinneqarsimavoq, taamaammallu Kalaallit Nunaanni pissutsinut immikkooruteqarluinnartunut aalisartut, piniartut savaatillillu suliaqarfiinut tulluarsagaalluni.